علشان تقدر تقيم جوده برنامج الحسابات الخاص بادارة محلك التجاري و علشان تتجه لحوسبة مؤسستك التجاريه فيه عوامل كتير بتساعدك في تحديد جوده البرنامج:-

في المقال ده احنا هنركز علي برامج حسابات و مبيعات المحلات التجاريه ( لان جوده كل برنامج بتختلف حسب نوع المؤسسه اللي مُصمم علشان يديرها )

من اهم العوامل دي و اللي هنشرحها بالتفصيل في مقالات متسلسله

1. توافر الامكانيات الاساسيه و البسيطه اللي المفروض تتوافر في اي برنامج حسابات مثلا زي

a) انه بيسجل و يدير المبيعات و المشتريات

b) انه بيظبط كميات المخزون اليا ( يعني انت مش بتحتاج تظبطها يدويا لما تشتري او تبيع )

c) انه يكون فيه نسبه امان عاليه لبياناتك وضمان استرجاعها بسهوله

d) ان يطبع فواتير و يشتغل علي الباركود

e) انه يسمح بمُرتجع الفواتير وده مهم جدا لانه بيحمي فلوسك و خزنتك

f) ان يكون فيه صلاحيات محدده لكل مُستخدم للبرنامج

g) وغيرها من الامكانيات اللي هناقشها في المقالات اللي جايه بالتفصيل

· الامكانيات اللي ذكرناها دي بديهيات في اي برنامج حسابات و لو مش موجوده يبقي حرام اصلا تقول علي البرنامج ده برنامج حسابات 🙂 و هيكون جداول اكسيل مش برنامج

2. نوع قواعد البيانات و لغه البرمجه اللي اتبني بيها برنامج الحسابات

a) قواعد البيانات ودي من اهم مكونات البرنامج و دي اللي بتضمن جوده البرنامج وسهولة العمل بيه و امان بياناتك ( طبعا ده لايغني عن باقي العوامل منها المُبرمج اللي صمم البرنامج ) فيه انواع كتيره من قواعد البيانات لكن فيه قواعد بيانات بيكون امان البيانات فيها اكثر و بيكون التعامل معاها اسهل زي (Oracle , MY SQL, SQL server )

b) اللغه اللي اتبني بيها البرنامج ودي برضه لغات كتير و ممكن المُبرمجين يستخدموا اكتر من لغه في نفس البرنامج بس اللي يهمك كمُستخدم في النهايه ان جوده البرنامج تكون عاليه و ميكونش فيه اخطاء في تصميمه خصوصا الاخطاء اللي بتكون في اصل البرنامج و بتغير في حساباتك , من لغات البرمجه المهمه c# , PHP . كل نوع من انواع البرامج بيناسبه لغه برمجه مُعينه زي نوعه ديسك توب ولا ويب وهكذا .

3. الخدمات المتوافره مع برنامج الحسابات زي :-

a) خدمات ما قبل و بعد البيع زي الدعم الفني وهل هو متوافر بسهوله وسريع , مُعظم الشركات الكبيره بتتجه للدعم الفني الاونلاين لانه بيكون اسهل ليهم واسرع ليك فانت غالبا بتقدر ترجع تشتغل علي البرنامج في نفس اليوم خلال ساعات او دقائق .

b) وجود نسخه تجريبيه مجانيه للبرنامج

c) وجود خدمه عملاء متوفره للرد علي اسئلتك في البرنامج ممكن تكون مش محتاج شرح كامل للبرنامج بس محتاج حد يرد علي شويه اسئله وخدمه العملاء او المبيعات بيكون عندها الرد .

d) وجود شرح للبرنامج مهم جدا سواء ان شخص من الشركه المُنتجه يشرحلك اهم النقط في البرنامج ودي غالبا بتكون بمقابل مادي او ان بيكون فيه فيديوهات لشرح البرنامج بالتفصيل لان عمليا اي برنامج حسابات بتكون محتاج تدريب عليه علشان تستوعب كل امكانياته ولانك بتحس في الاول ان الموضوع كبير و البرنامج صعب و مُعقد زي لما بتشتري موبايل جديد بتفضل اول فتره من استخدامه تكتشف امكانياته و بتحس ان الموضوع صعب شويه ومش عارف تتعامل معاه لانك مش اول ما تشتريه بتكون عارف كل امكانياته بس بعدين بيكون التعامل معاه سهل جدا .

· يُفضل متحكمش علي سهوله البرنامج من اول مره تستخدمه فيها ممكن تحكم علي النقطه دي بعد شرح البرنامج و فهمك ليه كويس جدا لان في الاول بتحس ان كل البرامج صعبه خصوصا لو اول مره تستخدم برنامج او لما تنقل من برنامج حسابات متعود على استخدامه .

4. من اهم النقط اللي بتحدد جوده برنامج الحسابات هو المؤسسه اللي صنعت البرنامج

هل هي مؤسسه و شركه ليها كيان , في حاله ان يكون فيه اي مشاكل تقدر تتواصل معاهم و تحل المشكله بسهوله ولا هو فرد عادي بيبعلك البرنامج او بمعني اصح بيدبسك فيه و يسيبك و بعدها مش بتعرف توصله . كمان حتي لو اللي ورا البرنامج شركه لازم تعرف حجم الشركه قد ايه لان ممكن يكون هو فرد واحد بس ظاهر قدام الناس باسم شركه . الموضوع ده مهم جدا فخلي بالك منه المؤسسه الكبيره و المحترمه بتبان من طريقه تعاملها مع عملائها و انها بتهتم براحه عملائها وتقديم خدمه ما قبل و بعد البيع بشكل يحترم العميل .

5. من العوامل المهمه هل امكانيات برنامج الحسابات قريبه من احتياجات و حجم مؤسستك

بمعني ان البرنامج امكانياته متكونش اقل من احتياجك و دي غلطه بيقع فيها كتير من الناس بيلاقوا برنامج مكتوب عليه برنامج حسابات و مبيعات و بيكون بمبلغ قليل جدا وده بيغريه انه يشتريه بس بعدين بيكتشف ان امكانيات البرنامج اقل جدا من احتياجاته و حجم مؤسسته, وبالتالي مش بيشتغل بالبرنامج و فلوسه بتقع في الارض بالتالي دايما استبعد البرنامج اللي امكانياته اقل من حجم مؤسستك , احيانا بيكون العكس امكانيات البرنامج اكبر من حجم المؤسسه في الحاله دي فيه نوعين , ممكن البرنامج تكون امكانياته اكبر شويه من احتياجك بس بشكل مش هيضرك بمعني انه مش هيخلي البرنامج مُعقد بالنسبالك فالامكانيات الزياده دي بتستفيد منها في حاله ان مؤسستك كبرت و احتياجاتها كبرت بالتالي ساعتها مش هتحتاج تغير البرنامج , او الحاله التانيه ان البرنامج فعلا كبير جدا علي احتياجات مؤسستك و مها كبرت المؤسسه مش هتحتاج الامكانيات دي فبالتالي استبعد البرنامج ده . النقطه دي مهمه لانك صعب جدا جدا تلاقي برنامج مُطابق لطلباتك او حجم مؤسستك الا اذا كان برنامج تفصيل بمعني انه مُصمم مخصوص لمؤسستك انت و بس وده هيكلفك كتير جدا .

في الاجزاء االجايه من السلسله دي هنناقش كل نقطه بالتفصيل و هنفتح باب المناقشه فيها و هنرد علي كل اسئلتكم .